Kómmende woensdag is ’t d’n 11e van d’n 11e. En gezie.n de ge.ldende Coronamaatreegele, kunne wïj dat nie op de gebruukeleke manier viere. We mugge mar mit hoog uut twee man tegeliek de straot op en dat gét ‘m dus nie worre. Mar wïj zien nie vör één gat te vange, dus we hébbe wat a.nders bedaocht:
Woensdagaovend zulle wïj precie.s öm ellef ovver a.cht (20:11 u.) en fillemke on-line zétte waorien wïj, saame mit Prins Ivo en Prinsés Henriëtte én de Prinse en Prinsésse van de Coloradokevers en de Waggelaars ’t seizoen toch op en tradiesjoneele manier oopene. Mit alles d’r op en d’r ân: ’t Limburgs en ’t Génneps volkslied, ’t offisjeele openingswoord dör Prins Ivo, ’t steek opzétte én de 11 spisjaole ientensies dör Vorst Maarten, vergezeld dör 11 daverende kanonsslaage.
Zörg daoröm, dat ge klaor zit, achter ów sche.rm en mâk die bizondere opening èèges mit op www.bombakkes.nl of www.facebook.com/bombakkes!