Kómmend vastelaovendseizoen zulle wïj génne nïjje Prins Carnaval uutroe.pe en zulle d’r gén groote aktiviteite mit veul publiek geha.lde worre.
Dör de huidige status van de Covid-19 krisis en te ontwikkelinge en verwa.chtinge vör de kómmende maonde, hebbe wïj, mit pien ien ’t hart, motte besluute öm kómmend seizoen génne nïjje Prins uut te roe.pe. Hoewel d’r nog en par maond te gaon zien, hébbe wïj motte konkludeere dat wïj enne nïjje Hoogheid mit de Vastelaovend 2021 en d’n ânloop daornaor toe, nie ’t programma en ’t feest kunne biede, dat enne Prins van ’t Bombakkes verdient.
Ôk zulle o.nze geplénde groote eveneme.nte ien novémber uutgestéld worre. D’n Aftrap schuuft en jaor op naor 11-11-2021 en ’t MaNieFest en de Gulden Humor zulle ien novémber 2022 georganiseerd worre.
Wél Vastelaovend
Hoewel de groote aktiviteite nów nie dör kunne gaon, wördt ’t straks wél d’n 11e van d’n 11e en stét ien fibbrewaori de Vastelaovend op de kalender. Op dit mome.nt zien we daoröm druk bezig öm te kie.ke hoe we dees mome.nte kunne gaon belèève en hoe we tóch, kleinschaliger, de Vastelaovend kunne viere en onder de mi.nse brénge. Want mit of zonder Prins, ’t wördt wél Vastelaovend!
Daoraover zien we ôk ien ovverleg mit de Gemeente Génnep en mit de a.ndere vastelaovesvereniginge ien de gemèènte. En örste gezamenlek persbericht is ôk vandaag gepubliceerd.
Gènne Optocht
Ömdat wïj snappe dat mi.nse bezig wille mit eventuweele bouwactiviteiten en a.ndere vörbereidinge, me.lde we hier expliesiet dat ôk d’n Groote Génnepse Optocht op vastelaoveszondag nie dör zal gaon. De omstandigheede zien te onzeeker en ’t is mar zeer de vraog of de veiligheidsregio straks überhaupt en vergunning gét afgèève.
Programma
Hoe ’t definitieve programma d’r uut gét zie.n, zulle we lâtter bekend maake. Blie.f o.ns daoröm op de bekende kanaale volge, vör updeets ovver de Génnepse Vastelaovend ien coronatijden. En, mit of zonder corana: wïj brénge uuteraard wél wér de jaorlekse Bombakkeskra.nt uut. Da’s ien ieder geval iets öm naor uut te kie.ke!
Op naor en bizonder vastelaovendseizoen 2020-2021. Blief allemaol gezo.nd en let en bietje op mekaor. Ôk ien ’t kómmend seizoen zal kli.nke:
’t Krö.lt d’r, Moel Moel!!
Prins, Raod van 11 en Bestuur van ’t Bombakkes