Ien unne goe.d gevulde feesttempel van 4-Events het de nïjje Hoogheid van ’t Bombakkes zich gisteraovend bekend gemâkt. En ’t is vör de Génnepse vastelaovendgékke génne onbekende: Niemand minder as Bombakkes vörzitter Marco Seelen gét vanaf nów as Prins Marco d’n Örste dör ’t lèève. Saame mit zien lieftallige Prinsés Monique, zal hïj o.ns vörgaon ien de kommende dolle daag.
Op ’t vernïjde “Prinsebal Masqué” waare veul mój verkleejde én gemaskerde ga.ste afgekómme. Iedereen was ien afwachting van ’t démasque, mar vördét ’t ze wied was wiere ö.rst nog de vier nïjje Dansmarietjes ân ’t publiek vörgesteld. Nina, Marloes, Lisa en Jet zulle o.nzen Hoogheid de kómmende jaore gaon vergezelle.
Daornao was ’t d’n tied vör Wiendkracht 11: Dees 15-koppige bend uut Venroy had wénnig moeite öm de zaol op te we.rme vör ’t groote mome.nt waor iedereen vör gekómme was. ’t Wier duuster ien de zaol, en mit een laser-projéksie zaage we unne tunnel ontstaon. Vorst Geert riep ut publiek op öm de maskers af te zétte en daornao begos ’t aftelle. ’t Sieloewet van de nïjje Hoogheid wier èn ’t eind van de tunnel zichtbaar. ’t Licht ging ân, d’n tunnel uut, en ienèèns was ie daor: Prins Marco d’n Örste van ’t Bombakkes!
Ut entoezjasme ien de zaol was grandioos. Zien èège joekskepel Zuutjes Èn blies ’t dak d’r af en al gáw sto.nd ôk Prinsés Monique nevve hurre Prins te straole.
Nao ’t vörlèèze van de proklamaasie en ’t bekénd maake van de benoeminge kwame Prins en Prinsés de zaol ien en kos ’t feest e.cht los gaon. Saame mit de Joekskapélle, DJ Hans én Wiendkracht 11 wier ’t nog unne fantastiese aovend.
Ge ku.nt nów alvast een bietje naogeniete mit de foto’s van Marco Thijssen.