Afgeloope zaoterdag was t nao hôst twee jaor eindeluk wèr zö wiet: we kosse wèr saame vastelaovend viere. Ien enne moj gevulde zaol bïj 4Events vo.nd enne geweldige Zitting plèts.

Nao de opening dör Jong, Alt en Belège, volgde en prachtig programma mit optredens van èège bojjem en daorbuute. Vör t örst ien twee jaor kosse o.ns èège dansgardes hun danskunste laote zien. Muzikaale begeleiding wier verzörgd dör Steven Gerrits en o.ns Officier Maarten Daniëls. Maarten wier op dees middag nog èns extra ien t zunneke gezet. Hij kreeg uut hande van President Bart Maes en Penningmèèster Bart Faassen van De SLV de orde van Verdienste vör zien ienzet en bijdraage an de Gennepse en Limburgse Vastelaovend.

De Ex-Hoogheden van t Bombakkes waren ok van de partij, en krege mit hun nïjjerwetse vertaling van n ental alderwetse Gennepse liedjes de hele zaol en t zinge. De neudige portie humor wier verzörgd door 3 buute-gennepse buutereedners. De uut Oostrum afkomstige Tanja Truckie vuulde de zaol perfect an en wist daormit de sfeer goed hoog te halde.

Nie alleen t publiek wier dees middag verrast dör t veelzijdige programma, ok onze geluidsman Cornel Gartsen kreeg enne fli.nke verrassing. Cornel stèt al jaore klaor vör t Bombakkes en de gennepse Vastelaovend. Niks is te gek en alles kan geregeld worre. Tot zien èège grote verbazing kreeg hij op ziene 50^e verjaordag uut hande van onzen Hoogheid Prins Ivo de titel van Ridder van t Bombakkes. Enne titel den hïj dubbel en dwars verdie.nt hét.

Op t èènd van de middag hét Gennepse Gemikste de zaol nog èns goe.d op de kop gezet. Mit hun reppetoir van limburgse slagers, kosse we nao twee jaor wèr ens goe.d pruuve an de vastelaovend, zödet we goe.d vörbereid zien vör de kommende vastelaovesdaag.

Cornel Gartsen geridderd en Maarten Daniëls onderscheiden.

afgeloope zaoterdag mit de zitting wiere d’r twee mi.nse ien ’t zûnneke gezét. Cornel Gartsen wier op zien fieftigste verjördag geridderd dör ’t Bombakkes. Tot zien èège verrassing kreeg hïj dees benoeming ovverhandigd dör Prins Ivo d’n örste. Middels dees benoeming treed hij toe tot de Sénaat van ’t Bombakkes. Cornel is genne man öm ien de belangstelling te staon. ‘T liefst stét ie a.chter ien de zaol öm de knoppe te bedie.ne. Maar nów mós ie toch ekkes ien de spotlights. Cornel stèkt heel veul uren ien de vastelaovend mit ’t verzörrege van microfoons en muziek. Ge klopt nooit tevvergèèfs án. Dees titel kömt hum dan ôk zonder meer toe.

Mit die eggeste zitting kwam ôk ’t bestuur van de SLV (Samenwirkende Limburgse Vastelaovesvereniginge) ekkes langs ien de persoon van President Bart Maes en penningmèèster Bart Faassen. Vör Maarten Daniëls hadden ze un orde van verdienste bïj zich. Dees orde kriegt Maarten vör zien ellef jaorig vorstschap van ’t Bombakkes en daorbïj ’t uutdraage van de Limburgse vastelaovend ien de provincie en mitname ien Génnep.

Names ’t Bombakkes feliciteere wïj dees twee mi.nse die ieder op hun èège terrein hun spoore verdient hebben ien de Génnepse vastelaovend. Mit Cornel en mit Maarten zal ’t d’r altied blie.ve krölle

Chris van Duuren unne geboore en getooge Gènnepse jong is nie mér.

Afgeloope dinsdag 19 oktober is Chris ovverleeje. Ien 1985 was Chris Prins van ’t Bombakkes en daornao trad hïj toe tot ’t broederschap van de Ex-Hoogheden. Daor was hij un fanatieke kracht mit o.a. de zittingsaovenden, Liedjesaovenden en ien muziekgezelschap ‘Bombarie’ sloeg ie de groote trom.

Ien Chris verlie.ze we unne Gènnepse Vastelaovens mi.ns mit un groot hart vör alles wat er gebeurt rondöm ’t Bombakkes.

Naames ’t Bombakkes wi.nse we de familie en alle mi.nse rondöm Chris veul sterkte toe de kommende tied.

Op Prinsjesdag viendt de tradisionele Senaatsvergadering plèts. Dit is dûkse tied ôk un moment öm minse te verrassen die veul vör ’t Bombakkes betèèkend hebbe.

Öm toe te treeje tot de Senaat is nie iets waorop ge kunt sollicitiere. Ge wordt benoemd tot ridder of officier. Dees benoeming kunde en mudde nie weigeren en de benoeming is vör ’t lèève.

‘T hét de Prins, Raod van Ellef en ’t bestuur van ’t Bombakkes behaagd öm de benoeming van Officier van ’t Bombakkes toe te kennen án Maarten Daniëls.

De benoeming is nie alleen ömdat Maarten ellef jaor Vorst is gewèst van ’t Bombakkes, maar ôk vör zien veule verdiensten achter de schermen van de Génnepse Vastelaovendclup. De website, Instagram, Facebook en twitter zien altied bij Maarten ien ’t beheer gewèst. Hij zörregde er altied vör dat alles optied en op de goeje manier op ’t ienternet en dus bij de minse kwam. Binnen de vereniging haj Maarten ôk altied de belangrieke funksie öm iedereen d’r goe.d op te laote staon. Striekskes, poschjetjes, stééke, Prinsemantel en ontwerpe van pinnekes en medailles waare inkele van zien veule taake.

En dûk wérd ’t vergééte want achter unne kél mit veule talenten en tomeloze ienzet stèt un vrôw mit minstens zöveul talenten en ienzet.

Maarten en Birgit profiesjat mit dees benoeming.

’t krölt d’r….

Afgeloope vrïjdag, 18 juni, was de jaorvergadering van ’t Bombakkes. Vör ’t örst ien lange tied kosse we wér ’s fysiek vergadere, al was ’t nog mit bepe.rkinge. Ien de zaol van Pica Mare kos genoeg afstand geha.lde worre en dat was gelukkig nie moeilek want ’t was we.rm zat.

Mar de vergadering was öm un a.ndere reeje heel bizonder: Vörzitter Marco kôs mar liefst vier nïjje leeje van de Raod van Elf wélkom hiete: Vanaf 11 novémber zulle Patrick Lamers, Mark Daemen, Martijn Wilbers en Frank van Ginkel officieel de steek en versiersele van ’t Bombakkes mugge draage. Wïj wi.nse ze, saame mit hun vrollie Nienke, Iska, Fabienne en Susan heel veul schik en suukses bïj o.ns mójje clup.

Nao de begroeting was ’t tied vör de officiële Vorsteleke aoverdracht. Mit de vastelaovend was al bekend gemâkt dat Geert Spikmans Vorst Maarten zów gaon opvolge, dat mos alleen nog efkes bekrachtigd worre.
Maarten beda.nkte, saame mit Birgit iedereen vör de veule mójje jaore en gaf nog ’s ân wat ie allemaol wel en nie zów gaon misse. Daornao wier ’t “Vorstendom” simbolies aovergedraage dör ’t aoverhandige van ’t Vorstekoffer én natuurlek de witte jas waorien we Geert ien vastelaovendseizoen zulle zien straole.

Daornao pakte Geert meteen ’t woord en wiere Maarten en Birgit nog ’s uutgebreid bedankt vör alles wat ze vör ’t Bombakkes hébbe gedaon. D’r waare mojje kedoos én ze wiere toegezonge mit un prachtig afscheidslied.
Nao afloop was wier d’r nog efkes gezellig naogeborreld, mar óm tien uur was ’t gedaon, want nog steeds corona….