Stadsprins Ivo d’n örste

O.nder ovverwéldigende belángstélling en mit veul entoezjasme is Ivo Reintjes uutgeroe.pe tot de 71e Prins van ’t Bombakkes. Saame mit zien Prinsés Henriëtte zal hïj ien Génnep heerse ovver alle Bombakkiërs en ze vörgaon ien de Vastelaovend. 
Prins Ivo en Prinsés Henriëtte, van harte profiesjat mit óllie uutverkiezing !!

Ien enne goe.d gevulde én mój èngekleejde zaol van 4-Events, was de spanning vuulbaar; de veule mój verkleejde ga.ste waare allemaol èève nïjsgierig naor de nïjje heerser ovver ’t Bombakkesriek, mar ôk naor de twee nïjje Da.nsmarietjes. Dat bleeke Esperanca Antonio en Noor Teerling te zien: twee entoezjaste meiden, die al maonde naor dit mome.nt uutgekeeke hân. ’t Plezier straolde d’r vanaf!
Daornao kos ’t spikkeliere en rikkraoje ovver de nïjje Prins beginne, zeker toen i.nkele “verdachte” ienèèns nie mér ien de zaol ènweezig waare.
Tégge hallef 11 was ’t ze wied: O.nder ’t gruun-witte ding én o.nder de klanke van de Génnepse joekskepélle miek d’n nïjje Hoogheid zien entree ien de zaol. Vorst Maarten telde saame mit ’t publiek af van elf wies nul en daor ienèè.ns sto.nd ie: Stadsprins Ivo d’n Örste! Zien Prinsés Henriëtte sto.nd al gáw nèvve ‘m. Ondanks dat ie al i.nkele jaore op de lieskes sto.nd was de verrassing tóch groot en natuurlek klo.nk ’t al meteen: Zunne goeie hébbe wïj nog nie gehad!

’t Prinselek Paleis stét op de Stamelbe.rg en daor is zondag 12 jannewaori ’t Oope Huus, vanaf 13:30 uur. De resépsie van Prins Ivo en Prinsés Henriëtte stét geplénd op zaoterdag 25 jannewaori vanaf 18:30 uur ien Pica Mare/4Events.

Ondertusse kunde de foto’s van ’t Prinsebal , van ’t Oope Huus en en fillemke van de spietsj van de vörzitter ôk al bekieke. Mit da.nk èn d’n Haon, ’t Plékplötje en Snuutje.

Prins Ivo d’n örste!!