De zittingsaovend van ’t Bombakkes kende veul högtepu.nte dit jaor. Mit én mundig gevariejeerd programma, mit heel veul artieste, wier ’t publiek tot nao twellef uur ’s na.chts fantasties geammesierd.

(Dör Bertus alias de Flitser)

Vördat Vorst Theo Roosenboom names Prins Maarten I alle énwezige wélkom had gehiette, had joekskapel Zuutjes En, éngevuld mit i.nkele léje van Nève d’n Diepvries de zoal getraktierd op gezellige blaosmeziek. Vör Vorst Theo was ’t nao 16 jaor de létste keer dat hïj de zitting zów prizzentiere. ’t Urste optréje van d’n aovend wier verzörgd dör de jongste lichting van de Bombakkes Dansgarde, mit én sprookje uut 1001 na.cht. ’t Was vör dizze groep ’t debuut op de zitting en ’t mot gezét zien, de meides deeje ’t ummundig goe.d. Ze krege en daverend applaus uut de zaol.
Trug van én “sabettikel” jaor, ware de Prullekes. Mit enne bombastiese ientocht, mit ien hun midde de Romeinse keizer Spikius, kwame zïj nao 2000 jaor trug ien Gennep. Ze mieke vanaf ’t Genneperhuus enne ro.ndrit dör Gennep en vergeleke daorbïj nów mit vroeger. Konklusie: ôk nów is d’r nog van alles mis ien Gennep. En ’t eind van hun optréje was d’r én onderschéjjing vör Vorst Theo, ien de vörm van wat prullekes, as bliek van da.nk en vöral waardiering vör de manier waorp hïj al die ze.stien jaor de zitting van ’t Bombakkes het geprizzentierd.
De ex-Hoogheden van ’t Bombakkes zonge nao dit keizerleke optréje hunne winnende schlager “Ik maak mien ège nie mèr druk’.
D’n urste buut van d’n aovend was van Marc Heinrichs. Nao zien debuut van vörig jaor prizzentierde hïj zich nów as iemand den én de bar enne grote moel had en dat dan ôk mar ’s vanaf ’t podium mos zien waor te make, volleges de vörzitter van ’t Bombakkes. Hïj had nét én nïje boks en aoverhemd geko.cht en wilde die én ’t pebliek laote zie.n. Hïj kende ôk nog enne goocheltruuk waorbïj hïj de hullep van iemand uut ’t publiek neudig had. ’t Wier én zeer vermakelek optréje, waorbïj ’t pebliek mé.j nie mér bïjkwam van ’t lache. En daverend applaus was zien beloning.

De middelste lichting van de Bombakkesdansgarde presentierde daornao enne mójje gardedans, den mit veul flair uutgevoerd wier. Vanuut ‘t Ven was politiek commentator Johan van de Grenskant wér ien Gennep nérgestreken. Op zien bekende wieze bekeek hïj wér ’t politieke gedu.ns ien stad en la.nd. Ziene kie.k op Gennep was nie e.rg optimisties. “’t Ennigste wat Gennep nog én toekomst het is ’t verléje” was zien konklusie. Veul bewondering had Johan vör Dèke Huusman, , den toch mar wér iedere wèèk zien präötje hèè.lt ien zien èège TV programma, ‘God én de Nierst’. “Probeer mar ’s en brug te slaon naor die ongeleuvige én d’n aoverka.nt!” ’t Ven had enne pries beschikbaar gesteld vör en organisatie of persoon ien Gennep: “’t Vitale Vé.rke van Ven-Zelderheide”. De zaol mocht kieze wie da zów winne en de keus viel op dèke Huusman, den ’t vè.rke ien ontvangst mocht neme, mar ‘m ôk meteen wér trug mos gève, want Johan had ’t nog ien Ootersom nodig. Typisch én geval van “Schwein gehabt” dus.

De ex-Hoogheden van ’t Bombakkes hadde én nïj programma: “Kél biet ho.nd”. Daorien kwame allerlei ripportazjes én bod en wiere mi.nse geïntervjoewd. Trugkerende vraog was “Wanneer hedde gïj vör ’t létst gewerkt?” Een van de ripportazjes ging aover stadsarcheoloog Jan Wessesl den en heel bizondere vondst gedaon. Mit opgravingswerkzaamhede op én geheim geha.lde lokasie was hïj op enne heel bizondere ketting gestote. ’t Bleek de sins vörrige wèèk verdwene ambtsketting van burgemèèster de Loo te zien. Dankbaar nom Marlies ’t kleinood ien ontvangst. De a.ldste lichting van de Bombakkes Dansgarde brôcht daornao enne mójje sjoowda.ns op meziek van Christina Aguilera.
De vollegende buut was van Rob Stevens, dizze keer wér vör ’t grötste deel op rijm. Hïj had zien optréje ien tweeje gesplists. Ien ’t örste deel vertelde hïj ien plat Nimwègs aover zien iengewikkelde familierelasies. Ien ’t twédde deel nam hïj op rijm én groot éntal Gennepse zake op de korrel.
’t Optréje van duo Keps besto.nd afwisselend uut liedjes én nïjsflitse. Vöral die nïjsflitse werkte op de lachspiere van ’t pebliek. Berry Knapen was de létste buutreedner van d’n aovend. As Dokter Botox kwam hïj vertelle aover zien priveekliniek waor mi.nse zich kunne laote pimpe. “De mi.nse worre steeds gékker”, liet ie wete. “Ze wille steeds meer én hun lief vera.nderd hebbe en wïj zien d’r goe.d mit.

’t Slotoptréje van d’n aovend wier verzörgd dór Kartoesj. Dees Limburgse topformasie en veulvuldig deelnemer én de finale van ’t LVK, trakteerde ’t publiek op én groot éntal Limburgse liedjes. Al gáw was d’r génne stoel mér bezet en da.nste iedereen mit op hunne énstèè.keleke meziek. Ien enne grandiooze finale trok iedereen ien de pollenaise dör de zoal en aover ’t podium. De zitting 2009 kende zo en knallend eind, waorien iedereen uut zien dak ging.

Nog veul meer foto's zien te viende ien 't spissjale album.