Mit en par mójje wöörd en 't opzette van de steek, het Prins Maarten I op d'n ellefde van d'n ellefde 't Génnepse Vastelaovendseizoen offisjeel geopend. Daorvör was d'r de tradisjonele openingsmis ien de St. Martinus bombasiliek.

Öm de relasie tusse geleuf en vastelaovend nie uut 't oog te verlie.ze, wördt de offisjele opening van 't seizoen altied vörafgegao.n dör en Hellige Mis onder leiding van Erekanunnik Dèèke Huisman. De dienst wier opgeluusterd dör en uut de gezamelijke joekskapelle samegestelde kapel én de zengers Herman en Monique, mit Toon op d'n trékbuu.l. 't Was en heel mojje bïjènkomst, waor veul éndacht was vör 't Jubileumjaor van de Colloradokèvers én de naodruk lag op 't, ien de geest van Sintermerte, same dè.le. Nao afloop kreeg Prins Maarten nog de tradisjonele ga.ns van d'n Dèèke aoverhandigd.

Bïj 't Stadhuus stonde toen al veul mi.nse te wa.chte op de offisjele opening. Nao en welkomstwoord van Vorst Theo mocht d'n Hoogheid de Vastelaovend offisjeel opene en kosse de stéé.ke wér op. Daorna wiere d'r 11 lichtkogels éngestokt (alles bïjèn 165.000 lumen) en bïj iedere kogel had Theo en mojje intensie.

Eén van die lichtkogels was vör de nïje Compaene van 't Bombakkes. En de vollegende offisjele daad van Prins Maarten was dan ôk öm de urste 11 Compaene symbolies te ienstallere. Dör 't ömhange van de spissjale medalje wiere deez mi.nse écht welkom bïj de klup gehiette.

Nao 't offisjele buutegebeure wier d'r ien rissidensie de Kroon nog lekker naogeborreld.

Alle foto's van Bertus staon ien dit album.