Afgeloope zaoterdag kwam d'r en eind ân de regieringsperiode van Prins Marcel d'n Urste en zien Prinses Marleen. Op 't gezellig drukke Boerebal ien Hotel de Kroon wier d'n Hoogheid van 2011 van zien Prinseleke waordighede ontdaon en daornao dör de ex-Hoogheden van 't Bombakkes opgenoome ien hun Broederschap.

Vördat 't zewiet was, sto.nd d'r nog wel 't één en a.nder op 't programma. De gezameleke Génnepse Joekskepélle zörgde vör en goeie sfeer waornao de de nummers 3, 2 en 1 van 't afgelope jubeleum Schlagerbal hun liedje nog 's lie.te heure. De ex-Hoogheden (die toch al enwezig mosse zien) braochte "Waor hédde al d'n tied gezèète", Geert Peters en de Roze Vogols bezonge nog 's "de Niers" en Die van de Go.lde vroege zich nog steeds af: "Van wie ziede gïj d'r énne?". Nao dees optreejes mocht toen nog Prins Marcel op te toffel öm ân zien finale te beginne. Hïj begos evvel nie mit iedereen te beda.nke. Ien pléts daorvan had hïj en groote verrassing vör alle Bombakkiërs: De Stappers, en kwartét Venrojse jonges die vörrig jaor 't Tiener Vastelaovendliedjes Konkoer gewonne hadde, kwaame vanuit de keuke 't kefée ien, tot groot enthousiasme van met name de enwezige vrollie. Mit hun enstèèkele liedjes wisse ze de sfeer tot en kaokpu.nt te brenge.

Daornao nam d'n Hoogheid nog efkes 't woord en bedankte hïj kort iedereen vör een prachtig vastelaovesjaor. Langer uutstelle had gén zin mér. Same mit Vorst Maarten dronk ie 't tradisjoneele glé.ske fra.nse koenjak, waorop de joekskapelle de krääjemars begosse te speule. Eén vör een naame de adjudanten en de schorrie 'm zien prinseleke attribuute af, van zien vèère op de stéék tot en zien zwarte schoe.n. Daornao kreeg ie de boerekiel van de Ex-Hoogheden ân, enne rooje zakdoek öm, en kieps op en zelfs en par klö.mp. Prins Marcel was wér gewoon Boer. Names de ex-Hoogheden kwam Ex-Prins Jacob I 'm uutnodige öm toe te treeje ien de kring van hun Broederschap, waornao ze 'm mit zien alle de weg naor de tap weeze en ie ze op en rö.ndje kos trakteere.

't Bombakkes zit nów zonder Prins, mar die situaasie zal nie lang duure. Kómmende zaoterdag zal ien en haopelek bomvol Pica Mare de opvolger van Prins Marcel zien opwachting maake. Daoröm wie.r d'r ôk nie lang getreurd öm 't afscheid van en prachtig Prinsepaor en bleef 't nog lang gezellig onru.stig ien de Kroon.

Alle foto's die de Flitser van 't Boerebal gemakt hét, staon ien dit album.