Afgelope zaoterdag hébbe wïj op en gezellig druk Boerebal ien 't café van Hotel de Kroon afscheid genome van Prins Alfred d'n Urste en zien Prinses Ellen.

D'n aovend begos nao en kort welkomstwoord dör Vorst Maarten mit de nummers twee en één van 't afgelope Schlagerbal. De Oranje Vrollie zonge nog 's dat ze 't kwiet ware en de Ex-Hoogheden (die 't zonder vörzenger Hans mosse doe.n) bezonge de ooievaars op 't stadhuus mit "Unne Génnepse Vogel". 
Daornao wiere de Da.nsmarietjes Anke, Imke en Iska op de tôffel gevraogd. Ôk zïj name dizzen aovend afscheid van 't Bombakkes. Ze wiere dör alle enwezige, onder begeleiding van de joekskapelle Zuutjes Én en Névve d'n Diepvries, nog 's goe.d toegezonge en beda.nkt vör hun ienzet vör de Génnepse Vastelaovend.

Rond hallef ellef was 't vör Prins Alfred en Prinses Ellen d'n högste tied öm vör de létste keer de tôffel op te gaon. Nog ene keer werkte ze zich ien 't zweet. As extra verrassing wier dör "Daor kriede mar praot van" nog enne keer 't "lijflied" van 't prinselek paor gezonge: "Vandaag". Ondertusse liepe de adjudante al te sjówwe mit 't koffer en liep Vorst Maarten al as ennen aosgier mit de tradisjonele gleskes koenjak rondöm de tôffel. Öm ellef uur was 't schluss en kreeg Prins Alfred 11 minute öm op zien èège manier afscheid te neme van zien onderdane. Hïj bedankte iedereen die same mit hum 't vastelaovesjaor 2010 tot iets onvergèèteleks gemâkt hadde. Dat deej hïj ôk dör en mój lied te zinge; "Enne keer prins te zien".

Toen begosse de joekskapelle en de krääjjemars en onder 't genot van 't létste gleske koenjak bedankte Vorst Maarten Alfred en Ellen nog 's vör en magnifiek vastelaovesjaor. Toen begos hïj mit 't ömkatte van Alfred van Prins tot Boer. Langzaam maar zeker wiere Alfred al zien prinseleke waordighede afgenome wies dat ie uuteindelek as Boer Alfred dör de ex-Hoogheden, onder leiding van Ex-Prins Jacob d'n Urste mit naor de tap genome wier. Daor wiere natuurlek nog één of twee pötjes bier gedro.nke. Dat was ôk 't mome.nt dat 't raojje van de nïjje Prins begos. Boer Alfred had de eer öm de urste namen ien te vulle. Of ie daormit nog wat verdient het, weete wïj pas op zaoterdagaovend 5 fibbrewaori rond de klok van 11 uur.